Ég og Ingi R. Ingason framleiðandi Kompáss erum nýkomnir frá litlum 
bæ á suðurströnd Japans sem heitir Taiji. Þetta er þekktasti 
hvalveiðibær Japana, en á þessu ári er því fagnað að 400 ár eru síðan 
skipulagðar hvalveiðar hófust í bænum. Við erum að vinna að ítarlegri 
fréttaskýringu um hvalveiðar Íslendinga og notum tækifærið til að 
skoða menningu Japana hvað varðar hvalveiðar. Hefðirnar eru mun 
sterkari hér í Japan, heldur en nokkru sinni á Íslandi og segir 
úrvalið af kjöti sína sögu. Í bænum búa 3500 manns og það telst 
lítill bær í þessu 126 milljóna manna landi. Allsstaðar eru myndir 
eða styttur af hvölum og bryggjurnar undirlagðar af hvalveiðibátum. 
Mjög merkilegur staður, en saga hans verður sögð í Kompási þann 10. 
Desember.

 
Ferðin til Taiji var skrautleg út af fyrir sig. Við ákváðum að nota 
lestarkerfið til að komast á staðinn. Þurftum fyrst að komast af 
hótelinu á Yokohama lestarstöðina. Þaðan fórum við með Nozumi 
hraðlestinni til Osaka, en lestin fer á allt að 300 km hraða. Ekki 
vorum við heppnir, fengum ekki sæti þannig að við máttum dúsa á 
gólfinu í tæpa þrjá tíma með sushi og vatn í fanginu. Skemmtileg 
upplifun samt. Frá Osaka tók við fjögurra tíma lestarferð með Japan 
Railways á stað sem heitir Kushimoto. Þá þurftum við aftur að skipta 
um lest sem fór til Taiji. Þar tók á móti okkur Hayito sem lóðsaði 
okkur um staðinn, útvegaði okkur viðtöl, kom okkur í samband við fólk 
og þýddi fyrir okkur. Frábær náungi sem hefur lært sögu hvalveiða í 
Japan og hefur gífurlegan áhuga á hvalveiðisögu Íslendinga.

Hér fyrir neðan má sjá hrefnusushi, nammi

Það var góð tilfinning þegar Ómar og Rósa Ingólfs lásu upp úr umslaginu á Eddunni í fyrrakvöld. Kompás glumdi í eyrunum og eftir að hafa kysst konuna og faðmað Sigmund Erni tók við gangan upp á svið. Hélt það væri erfiðara að feta þennan gang - upp á sviðið til að taka við verðlaununum fyrir Sjónvarpsþátt ársins. Mikil viðurkenning á brjálæðislega mikilli vinnu. Það er svo ótrúlega margt sem snýr að þáttagerð sem þessari. Deadline í hverri viku og allt þarf að ganga upp. Og það eru ótrúlega margir sem koma að Kompási fyrir utan ritstjórn, fréttamenn og framleiðanda. Ég ætla að nota tækifærið og þakka fólkinu sem kemur nálægt þættinum; Einari Árnasyni kvikmyndatökumanni sem hefur verið með okkur frá upphafi. Hann er kominn með Kompáshreyfingarnar í myndavélina og kann öll trikkinn. Hann var því miður ekki á Eddunni - var í New York. Tinnu Magnúsdóttur sem aðstoðaði okkur við dagskrárgerð um langt skeið. Hún er núna að skrifa lokaritgerð í margmiðlunarfræði við danskan háskóla. Konna sem býr til stiklurnar fyrir okkur - alltaf jafn vel gerðar. Róberti Marshall fyrir frábærar hugmyndir og ferskan andblæ inn í þáttinn meðan hann var yfirmaður NFS. Hann og Þór Jónsson eru mínir mentorar í fréttamennskunni, eins og ég sagði í þakkarræðunni í gærkvöldi. Ég vil líka þakka skriftunum á NFS, Oddi Ástráðssyni fyrir upptökurnar, öllum fréttaklippurunum, öllum myndatökumönnunum á NFS og öllu fólkinu sem hefur verið að senda okkur góðar hugmyndir að umfjöllunum.

Það er frábært að fá gott tips frá fólkinu út í bæ - því það tips getur orðið að stórfrétt - stórmáli. Munið því netfang þáttarins; kompas@365.is. Annars blogga ég næst frá Japan, en ég og Ingi Ragnar framleiðandi erum á leiðinni þangað að gera fréttir. Meira um það síðar.

Jói